Sual rêng rêng chu Chhandamtu hnênah puan tûr a ni. Thinlung chhûng aṭanga sim dùhna avanga sual puan a nih chuan, chû chuan mihring nunah ṭhatna a chhuah thei a. Sual simna leh sual puanna chu inngaihtlãwmna nên a ni tûr a ni. “A sualnate zêptu chu a hmuingîl lovang a; mahse tûpawh inpuang a, hawisantu chuan zahngaihna a hmû ang.” (Thufingte 28:13) Pathian zahngaihna hmuh dan chu mawl tak, fek tak leh chhan ṭha tak nei a ni. Sual ngaihdamna kan neih theih nân LALPA’n thil lungngaih thlâk tak ti turin min duh lem lo. Pathian fak hlawh nân emaw, kan bawhchhiatna khuh turin emaw, hrehawm taka zin kual emaw, sim tih entîr nana mahni intihhrehawm vak te hi kan tan a mamawh lo, amaherawhchu a sualnate zêp lova puangtu chuan zahngaihna a hmu ang.
Tirhkoh chuan, “Chutichuan, tihdama in awm theih nân in sualte thupha chawi tawn ula, inṭawngṭaisak tawn ṭhîn rawh u,” (Jakoba 5:16) a ti a. Sualte ngaidam theitu Pathian hnênah chuan in sualte thupha chawi u la, in diklohnaah pawh thupha inchawisak tawn ṭhîn rawh u. I ṭhian emaw, i ṭhenawm emaw i tihvui tawh chuan, i diklohna chu i hriattîr tur a ni a, ani’n a lo ngaidam ve bawk tur che a ni. I tihlungnihloha chu Pathian ta a nih avangin, Pathian ngaihdamna dîl rawh, chutianga i unaupa i tihlungawi loh chuan, a Siamtu leh a Tlantu chungah i lo sual a ni. Chu thu chu min Sawisaktu diktak, kan Puithiam Lal ropui ber “Keimahni anga kawng tinrenga thlemna tâwk tawh, kan chaklohziate min hriatpuitu” (Hebrai 4:15) leh sual bawlhhlawh kai tinreng tlengfai theitu hmaah chuan thlen a ni a. An diklohna hrechhuak a, Pathian hmaa inngaihtlawmna la nei lote chuan, inremna thinlung hmasaber pawh an la tikim lo. Simna hi awm tur reng a ni tih kan la hriatchian loh a, inngaitlawm leh lungchhia kan sualna chu tenawm a ni tih kan hriatchian bawk si loh chuan, sual ngaihdamna tur kan zawng tak tak ngai lo, kan zawn si loh chuan Pathiana muanna pawh kan hmu ngai hek lo. Sual ngaihdamnate kan neih lohna chhan chu, kan inngaihtlawm duh loh vang chauh a ni. He thuah hian zirtîrna chiang tak pek a ni. Sual puanna chu vantlang zîngah emaw mahni chauhvin emaw pawh thinlung taka tih a ni tur a ni, sual puanna hi fîmkhur lo tak leh ngaihtuah chiang loa tih mai mai tur a ni lova, mîin sual tenna a neih hma chuan tihluih tur a ni lo. Sual puanna, thinlung chhûng bera lo chhuak chuan Pathian khawngaihna tawp thei lo lam kawng chu a hmuchhuak ṭhîn. Sâm phuahtu pawhin “LALPA chuan thinlunga lungchhiate chu a hnaih ṭhîn a, rilru taka inchhîrte chu a chhandam ṭhîn,” (Sâm 34:18) a ti. Inpuanna diktak chuan awmdan danglam bîk a neiin, a sualna bîk chu a hrechhuak ṭhîn. Chutiang sualnate chu Pathian hnen chauha thlen chi a awm thei a, an thil tihdiklohna hnen ngeia puanna tur sualte a awm thei bawk a, mipui zînga puan chî sual a awm thei a, mi pui zînga puan chi chu mipui zîng ngeia puan tur a ni. Amaherawhchu sual puanna zawng zawng chu a chiangin, a dik tur a ni. I sualna ngeite kha zêp tur a ni bawk hek lo. Samuela damlai chuan, Isarael hote chu Pathian an rinna kha an lo hloh tâk avangin, hnam rorelsak tura A thiltum A tihnghehzia leh, A humhimna an rinnate chu an hloh zo ta a. Khawvêla Roreltu ropuiber chu an hawisan a, an vela hnam dangte anga awptu neia rorel kha an lo duh ta a. Muanna an hmuhchhuah hmain, he inpuanna fiah tak hi an siam ta a ni. “Kan sualna zawng zawng chungah, he sual, lalber, kan ngenna hi kan belh ta si a,” (1 Samuel 12:19) tiin. Mi’n a tihdikloh chiah nia a hriat kha a puang tur a ni. An lãwmnachang hriatlohna khan an rilru a tihrehawmin, Pathian hnen ata anmahni a tihrang a ni. Sual simna leh siamṭhatna tak tak tel lova sual puanna chu, Pathian lãwmzawng a ni lo. Nunnaah hian danglam duhna tak tak, rilrua duhthlanna a awm tur a ni. Pathian duh lohzawng thil reng reng chu dahbo vek tur a ni. Kan tih ve tur chu kan hmaah fiah takin dah a ni: “Insil ula, intifai rawh u; ka mithmuh phâk lohah in thiltihte hi a sualna chu dah bo rawh u; sual tih hi bang tawh ula, thil ṭha tih zir rawh u; rorelna fel zawng ula, hnehchhiahna tuarte chu ṭanpui ula, pa neilote chu rorel sak ula, hnehchhiahna tuarte chu ṭanpui ula, pa neilote chu rorel sak ula, hmeithaite chu sawipui rawh u,” (Isaia 1:16, 17) Paula’n simna thu chu hetiangin a sawi a: “Tichuan, ngai teh u, Pathian duhzawng anga tihlungngaiha in awmna ngei chuan, fîmkhurna te, insawi thiamna te, thinurna te, hlauhna te, ṭhahnemngaihna te, phubalâkna te nangmahniah a va siam nasa êm ve aw! Engkimah chung thû-ah chuan in thiang tih in intilang ta a.” (Ezekiela 33:15) Sualnain chhûnglam hriatna dik a tihthih tawh chuan, thilsual titu chuan a nungchang diklohna a hmu thiam lova, thil sual a tih tak nasatzia pawh kha a hrechhuak thiam ṭhîn lo. Thlarau Thianghlim thiltihtheihnaa a intukluh si loh chuan, a sual hmuh thiamlohna hmunah khân a awm reng a ni. Chutianga a awm lai chuan, a sual puannate kha tih tak zet leh thiltih zahzelah chhuanlam a siam a, chhan eng emaw chu awm lo sela chuan a inchhir lehna tur thilte kha chu ti lo tawp tur angin a insawi leh ṭhîn. Evi leh Adama khan thei rah ei thian loh an ei hnu khan an lo mangangin an lo zak ta êm êm a, an han ngaihtuah hmasak ber chu an sual chhuanlam tur leh, thihna hlauhthawnawm tak aṭanga himna tur chu a ni. LALPA’N an sualna chungchang A han zawh khan, Adama chuan sualna chu Pathian chungah leh a kawppui chunga puhthlûk tumin a chhang ta mai a. Adama chuan, “Mi awmpui tura i hmeichhe mi pêk ngei khan thingrah chu mi pe a, ka ei ta a ni,” (2 Korin 7:11) a ti a. Hmeichhia lah khan rûl a mawhchhiat rawk bawk a, “Rûlin mi tihder a, ka ei ta a ni,” (Genesis 3:12, 13) a ti. Engvangin nge rûl i siam? Engvangin nge Eden huana lo luh I phalsak teh reng? Hêngte hi hmeichhia chuan a sual chhuanlam atana a siam chu a ni. Chutiang chaun an tlûknaah khân Pathian an mawhchhiat a. Mahni thiam inchantîrna rilru hi chu Setana lak aṭanga chhuak a ni a, chu chu Adama fapate leh fanute hian an chiang ta vek a ni. Hetiang sual puanna hi chu Pathian Thlarau aṭanga chhuak a ni a, Pathian lãwmzawng a ni bawk hek lo. Sual simna dik tak tak chuan, a sual kha a phurhtîr a, vervêkna leh bumna tel lovin a sual kha a pawm mai ṭhîn. Chhiahkhawntu mangang tak, van lam pawh hawi ngam lo angin, “Pathian, kei misual chungah hi zahngai ang che,” a ti ṭhin a; sual simte tâna A thisen chhuak khân Isuan A sawipui dâwn avangin, chûng an sualte hrechhuaktu chuan a ni thiamchang dawn ni. Simna leh ingngaihtlawmna dik tak, Pathian thuin a entîr chu sual puan duhna, mahni inthiamchawpna awm hauh lo chu a ni. Paula chuan amah leh amah inhliahkhuh a tum lo a, a sualna chu zêp tum lo chuan nasa takin a tilang ta a ni. Paula chuan, “Puithiam lalte hnênah thu ka hmu a, mi thianghlimte zînga mi tamtak tãn inahte ka khung bawk ṭhîn. An tihhlum laiin, tihhlum remti lamah ka ṭang bawk ṭhîn a. Inkhawmna intinah ka hrem fo a, Isua thu sawichhiat tîr ka tum hram ṭhîn a, an chungah ka kawlh êm êm a, ram dang khaw thleng pawhin ka tiduhdah ṭhin,” (Tirhkohte 26:10, 11) a ti. “Krista Isua misualte chhandam turin khawvêlah hian a lo kal tih hi, a rinawmin a pawm tlâk êm êm a ni, an zînga misual ber ka nih hi,” (1 Timothea 1:15) a lo ti ngam ta hial a ni. Thinlung lungchhia leh inngaitlawm, sual simna dikin a hneh tawh hnu te chuan, Pathian hmangaihna leh Kalvari man chu an ngaisang ngei ang; fapain a pa duhtak hnena a inpuang angin, sualsim tak tak chuan Pathian hmaah a sualna zawng zawng chu a rawn thlen ang. “Kan sualte thupha kan chawi chuan, kan sualte ngaidam tur leh, kan fel lohna zawng zawng tlengfai turin Amah chu A rinawmin A fel a ni,” (1 Johana 1:9) tih ziak a ni.
1 Comment
Solomona Thihlum
5/12/2021 12:09:50 pm
A ropui e, Amen...
Reply
Leave a Reply. |
Categories
All
ArchivesKan Article-te hi kan editor approve-te an ni vek lo. |