Pathiana nunna tak nei tûr chuan, A hnêna inpumpêkna dik tak neih a ngai. Pathian tâna inserh hranna neih a ngai a ni. Chapo leh rilru khingbâi takin Pathian hnên kan pan tûr a ni lo. Pathian thutiam chu, “Nangnin Mi zawng ang a, in thinlung zawng zawng nena mi zawn hunah chuan, min hmuchhuak ang,” (Jeremia 29:13) tih hi a ni. Thinlung hi a pumin Pathian hnena pêk tur a ni, chuti a nih loh chuan keimahniah, Pathian anna nei leh turin danglamna a awm thei lo. Pianghmangah Pathian laka tihhran kan ni a, Thlarau Thianghlimin kan awmdan chu hetiang hian a hrilhfiah: “Bawhchhiat leh in sualte avanga thi,” “Lu chu a pumin a nâ a, thinlung chu a pumin a chau ta a.” “Damlai reng reng a awm hek lo,” Setana thangah nghet takin kan awk a; “Diabola thang ata an chhuak thei mahna,” (Efesi 2:1; Isaia 1:5, 6; 2 Timothea 2:26) tia ziak ang khan. Pathian chuan min tihdam leh min zalentîr chu A duh êm êm a, mahse kan awmdan pumpui tihthar leh tihdanglam a la ṭûl miau si avangin Ama hnena kan puma kan inpêk a ngai a ni. Mahni leh mahni indona hi indona ropuiber a ni. Pathian duhzawnga mahni inpêkna leh inhlanna hi beih fo a ngai a, rilru erawh chu thianghlimnaa siam thar a nih hmain Pathian hnênah a intulût tur a ni.
Pathian rorelna chu, Setanan a lantîr angin, hrechiang lova intukluhna leh thununna ṭha hriatna lam a sawm zawk a: “Hawh teh u, i ngaihtuah tlâng teh ang u,” (Isaia 1:18) tih hi A thilsiamte hnena Siamtu sawmna chu a ni. Rilru phur tak leh châk taka inpêkluhna tih loh chu A lawm thei lo. Tìhluihna aṭanga ìnpêkna mai chuan rilrû leh nungchang ṭhanlenna a dãl a, mihring chu khâwl anga ti mai mai lék chauhah a siam ang. Chutiang chu Siamtû tum a ni lo. Pathian chuan mihring chu hmasawnna sang thei ber thleng turin A duhpui a. Kan hmaah hian A khawngaihna zâra min thlensak A duh êm êm malsawmna chu A dah a. A duhzawng chu keimahnia A tih theih nân Ama hnêna inpe turin min sawm reng a. Sual bawih aṭanga chhuak a, Pathian fâte nih zalênna ropui chang tûrin, keimahni ngeiin duhthlanna kan siam tur a ni. Pathian hnena kan lo inpêk hian, Ama hnen aṭanga min tihrangtu thil zawng zawng hi kan bansan vek a ṭûl a. Chuvangin Chhandamtu’n, “Chutiang bawkin, nangni zîngah hian tupawh a neih zawng zawng kalsan lo apiang chu ka zirtîr a ni thei lovang,” (Luka 14:33) a ti a. Pathian hnên aṭanga thinlung hipbo thei thil reng reng chu bansan tur a ni. Hausakna hi mi tam tak milem biak a ni a. Sum hmangaihna te leh hausak duhna te hi Setana hnena min thlungtu rangkachak khaidiat a ni. Hmingthanna leh khawvêla zahawm duhna hi ṭhenkhat milem biak a ni leh a. Mahni hmasiala, awlai taka khawsak leh mawhphurhna nei loa khawsak hi ṭhenkhat milem biak a ni bawk. Mahse heng bawia min phuartute hi tihchah vek tur a ni. Kan chanve hi LALPA tã, kan chanve hi khawvêl tã ni chung sîin kan awm thei lo. Mi ṭhenkhat Pathian rawngbâwl inti ve si, Pathian dan zawm tura mahni theihna ngeia innghat leh nungchang siam dik vanga chhandamna hmuh tumte an awm a. An thinlungte chu Kristâ hmangaihna hriatna thûk taka tihchet a ni lova, mahse vanram kai theih nan Pathianin Kristiante tihtur A hrilhte kha tih an tum satliah mai a ni. Chutiang sakhua chu engmah a ni lo. Krista chu thinlunga A lo chenin, rilru chu A hmangaihna leh Amah pawl nuam tihnain a lo khat ang a, tichuan Amah chu a lo intheihnghilh bawk ang. Krista a hmangaihna chu thil tihtîrtu bul a lo ni ang. Pathian hmangaihnain a túr dan hrethiamte chuan, Ama rawngbâwl turin tlemte leh hniam ber thawh an duh ngai lova, an Tlantu duhzawng nena inremna famkima awm máwlh chu an ngên zâwk ṭhîn a ni. Duhna takzet neiin an inpe zo a, an thilzawn hlu takah khan an duhzawngber chu a lo lang ṭhîn. He hmangaihna thûk tak nei lova Krista zuitu inti chu, ṭawng mai mai, dan anga thil ti mai mai leh mi pawnlang tak a ni. Kristâ hnena inpumpêkna chu inhlanna lian lutuk niin i ngai em ni? “Krista chuan Ka tan enge mi pêk?” tiin mahni han inzawt teh. Pathian Fapa chuan engkim—nunna leh hmangaihna leh tuarnate—min tlan nan A pe zo ta. Chuti a nih chaun keini nung tlâk lote hian, kan thinlung kan ui thei tur em ni? Kan damchhûng reng reng hian A khawngaih- malsawmna dawnpuitute kan ni si, hemi avang tak hian hriatlohna leh vanduaina thûk tak aṭanga chhanchhuah kan nihzia hi kan hrechhuak thei ṭhîn lo. Kan sualnain a tihhliam hnuin, hmangaihna leh thawina zawng zawngte hi pawisa loin, Amah chu kan thlîr reng thei dâwn em ni? Ropuina LALPA inngaihtlawmna nasa tak chu thlîrin, harsatna leh mahni inngaihtawmna avanga nunnaa kan luh theih dawn avang chuan kan phunnawi dawn em ni? Rilru chapo tam takte chuan, “Pathian nen inremna ka neih theih hmain engah tehlul nge ka tan sual sim leh inngaihtlawm a ṭûl ang?” an ti ṭhîn. Krista chu ka kawhhmuh a che. Ani chu sual nei lo chang pawh ni loin, van Lalber Fapa chu a ni, nimahsela, Ani chu mihring aiah mi zawng zawng tan, misuala chhiar a lo ni a. “Bawhchhetute zîngah chhiar tela A awm avangin: nimahsela mi tam tak sualna chu A phur a, bawhchhetute tân chuan A ṭawngṭai sak a.” (Isaia 53:12) Engkim kan pek vek hian enge kan bansan?—Thinlung sual bawlhhlawh, Isua tihthianghlim tur, Ama thisen ngeia tihthianghlim tur leh A hmangaihna chhiarsenlohin A chhandam tur chu. Sual zawng zawng bansan chu miten harsain an la ring cheu ṭhîn. Chutiang chu mi sawi hriat leh ziah lán pawh ka zak zâwk a ni. Pathian chuan kan tana neih tur thil ṭha berte chu chân turin min duh lo. Bansan tur A tih zawng zawngte chuan A fate ṭhatna tur chu A hmu reng a ni. Krista thlanglotute zawng zawng hian anmahniin an zawn âia thil ṭha zâwk pek tur A nei tih hria sela chu, a va tihzia dâwn êm! Mihringin Pathian duhzawng dodala thil a lo tih leh, a ngaihtuah hian, ama thlarau tana thil dik lo leh natna tur hlauhawm ber chu a ti a ni. Pathian, thilṭha ber hria leh A thilsiamte tana ṭhatna tur hlira ruahmantu khap kawngah chuan, lawmna tak reng a hmuh theih loh. Dan bawhchhiatna kawng chu hrehawmna leh chhiatna kawng a ni. Pathianin A fate ná tuar hmuh chu A nuam tihzawng tak a ni tih ngaihtuah hi a dik lo a ni. Van mipuite chuan mihring hlimna hi an engtopui si a. Kan Pa vana mi chuan A thilsiamte reng reng hlima tur kawng chu A khar awzawng lo. Tuarna leh beidawnna rawn thlentu, nawmchennate hi, hlimna kawng leh vanram kawng khartu an nih avangin, Pathian chuan bansan turin min duh. Khawvêl Tlantu chuan mihringte chu an nihna angin, an duhna zawng zawngte leh an famkimlohna zawng zawngte leh an chaklohna zawngte nen A lo lawm a; A thisen zarah chuan tlanna chu A phalsakin, sualna ata A tlengfai dawn chauh a ni lova, A nghâwngkawl bâta, A phurrit phur duh zawng zawngte thinlung chu A tilungawi zâwk dâwn a ni. Nunna chhang dîla A hnena lo kal zawng zawngte pêk A tum chu, muanna leh chawlh hahdamna a ni. Ani chuan thawihlohnain a thlen phak loh, lawmna nasa taka min hruai theihna tur thilte chauh ti turin min duh a. Thlarau nundan dik leh hlimna chu chhûng lama Krista siam puitlin a, beiseina ropui neih hi a ni. Mi tamtak chuan, “Engtin nge Pathian hnênah ka inpumpêk theih ang? an ti ṭhîn. Ama hnena mahni inpêk chu i lo duh a, mahse nundanah chuan i chau êm êm mai a, rinhlelhna bawih i ni a, i sual chîn ṭhin khân a thunun che a. I thutiamte leh tumnate chu a rintlak loh a. I ngaihtuahnate leh i tumnate chu i thunun thei bawk hek lo. I thutiam i hlen ngai lo tih i hriatnate chuan nangmah ngei i inrinna pawh a tichhia ang a, chu chuan Pathianin lawm thei lo chein a hriattîr ang che; nimahsela, i beidawng tur a ni lo. I tâna hriatthiam ṭul ber mai chu, duhthlanna diktak hriat a ni. Duhthlanna emaw thutihtlûkna emaw hi mihring nundana thiltihtheihna lian ber chu a ni. Thil engkim hi duhthlanna dik tak thiltihah a innghat a. Pathianin mihring hnênah duhthlanna chu A pe reng a ni; chu chu mihringten an hmang ve tur a ni. I thinlung chu nang chuan i tidanglam thei lo a, i thinlung duhnate Pathian hnênah i pe thei lo a, nimahsela, A rawngbawl chu i thlang thei a ni. I duhthlanna chu A hnênah i pe thei a, Ani chu tih tum tur leh bei tura Ama lawm nana nangmahnia thawktu chu A ni si a. Chutichuani awmdan pumpui chu Krista Thlarau thu hnuaiah chuan lo awmin, i duhnate chu Amahah chuan a awm ang a, i ngaihtuahnate chu Amah nen a lo inrem thlap tawh ang. Thilṭha leh thianghlim duhnate hi an kal dik chhûng chu a ṭha a; mahse heta i tawp mai chuan, engahmah a sâwt chuang lo. Mi tamtak chu, Pathian duhna anga inpêkna chang an hriat loh avangin, Kristian nih an duh lai leh an beisei laiin an boral ang. Tunah tak hian Kristian nih an thlang duh lo a ni. Duhthlanna dik tak i hman chuan i awmdan pumpui kha tihdanglamin a lo awm thei ang. I duhthlanna Krista hnêna i pêk chuan, lalnate leh thiltihtheihna zawng zawngte chungah thiltihtheihna neiin i lo indah reng a ni. Chelh nghet tur chein chunglam aṭangin chakna i hmu ang a, chutichuan Pathian hnêna inpumpêk fona zârah chuan, nundan thar, rinnaa nunna chu i nei thei ang.
0 Comments
Leave a Reply. |
Categories
All
ArchivesKan Article-te hi kan editor approve-te an ni vek lo. |