Misual sim lo chuan chatuan ram a luah thei lovang. Sual rêng rêng chuan chatuan ramah hmun a nei dâwn bawk hek lo. Chuvangin misual Chhandamtu Isua Krista chuan sim duh apiangte chu lãwm takin A ṭanpui ṭhîn. A thisen chu misual tân a far sî a. Engtin nge mihring chu Pathian laka a fel theih ang? Engtin nge misual chu tihfela a awm theih ang? Krista zarah chauh hian Pathian leh thianghlimna nen inremin kan awm thei a; mahse Krista hnênah chuan engtin nge kan kal ang? Pentekos nî a mipuiin an sualte an lo hriatchhuah a, “Enge kan tih tâk ang?” tia an zâwt ang bawk kha tunlaite hian an la zâwt zêl a ni. Petera chhanna hmasaber chu, “Sim rawh u,” (Tirhkohte 2:38) tih hi a ni. Chumi hnu lawkah, “Chuvangin in sualte thaibo a nih theih nân, sim ula, hawikir leh rawh u,” (Tirhkohte 3:19) a ti bawk. Simna hian sual vanga lungngaihna leh sual hawisanna a fãwmkêm a. Sualna hi a sualzia kan hmuh loh chuan kan bansan thei lovang; sual chu thinlung taka kan hawisan loh chuan nunah hian danglamna tak zet a awm thei bawk hek lo ang.
Siamna awmdan dik hrechiang thiam lo mi tam tak an awm. Mi tamtak chuan an thiltih sual avangin pawi an ti a, an thil tih dik lohin an chungah tuarnate a rawn thlen ang tih an hlauh avangin pawnlam thil siamṭhatnate an nei a. Amaherawhchu, Bible tihdan chuan hetiang hi chu simna a tling zo lo. Sualna ai chuan tuarna chu an pawi tih zâwk avangin, Esauva’n a fatîr nihna chu kumkhuaa hloh a ni ta tih a hria a, a lungngaihna kha chutiang lungngaihna chu a ni. Balaama chuan a kalna kawngah vantirhkoh khandaih hriam táwn keng a hmu a, a hlau ta êm êm a, tichuan a thih mai dawn avangin a sualna a pawm ta a; mahse sual simna tak tak te, tumna danglam ta leh sual tenna te a nei chuang hauh lo. Juda Iskariota pawhin a LALPA a mantîr khan, “Mi thiam thisen ka mantîr kha thil ka thil ka lo tisual a ni,” (Matthaia 27:4) tiin a puang leh a ni. Chutiang inpuanna chu a thinlung sual aṭanga thiamloh inchantîrna hlauhawm tak leh rorelna râpthlâk tak thlirnain a rawn tihluitîr mai a ni. A thiltihsual vanga thil hlauhawm tak ama chunga tla tur khan a tihlau ta êm êm a, mahse Pathian Fapa sualna nei lo a mantîr avang leh, Israelte Mi Thianghlim a phatsan avanga lungchhe khawpa a thinlung kehna a nunaha awm chuang lo. Faraoa pawh kha Pathianin A hrem lai khan hremna dang a pumpelh theih nan a sualzia chu a hrechhuak a, mahse Pathian hremna chu a reh veleh a rilru pangngai a pu leh ṭhîn. Hêng mi zawng zawngte hian sual vanga thil lo awm chu pawi an ti a, mahse sualna avang chuan an lungngai si lo. Amaherawhchu thinlung hi Pathian Thlarau thuneihna lama a inpêk hian, chhia leh ṭha hriatna chu tihharh a lo ni a, misual chuan Pathian dan, lei leh van awpna dan bul, thûkzia leh thianghlimzia chu aṭhen azara a lo hrethiam ṭhîn. “Êng tak, mitin tiêng ṭhin khawvêla lo kal mêk” (Johana 12:9) khan rilru chhûngril berte a rawn chhun êng a, thima thuhrûkte chu tihlanin an lo awm ta a ni. Sual inhriatna chuan thinlung leh rilru chu a lo hneh a. Misual chuan Jehova felna rilru chu a lo nei a; thinlungte Hmuchhuaktu hmaa a sualzia leh bawlhlawhzia chu a hre ta a. Pathian hmangaihna te, mawina te leh lawmna te chu a lo hmu thiam a, Pathian nena inzawm chu a lo chak ta êm êm a ni. A tlûk hnua Davida ṭawngṭaina khan sual vanga lungngaihna awmdan dik chu a entîr a, A simna chu a duhawmin a thûk a ni. A diklohna khuh tumna reng reng a awm lova, rorelna hlauhawm tlanbosan châkna reng reng a ṭawngṭainaah a lang lo. Davida chuan a dan bawhchhiatna nasatzia chu a hmu a, a rilru bawlhhlawhzia a hmu bawk a; tichuan a sualna chu a haw ta êm êm a. Ngaihdam dîl nan chauh a ṭawngṭai lo, thinlung thianghlimna dîlin a ṭawngṭawi bawk a. Pathian nen inrem theihna leh thianghlimna dîlin a ṭawngṭai a. Pathian nen inrema awma, inkawm leh thianghlimnaa lawm chu a lo châk ta ngawih ngawih a ni. Hei hi a rilru puan chhuahna chu a ni: “A bawhchhiatna ngaihdama awm a, a sualna hliahkhuha awma chu, a eng a thâwl e. Mi, LALPAN khawlohna neia A ruat lohva, a thlarauva tihderna reng reng awm lova chu, a eng a thâwl e.” (Sâm 32:1, 2) “Aw Pathian, I ngilneihzia ang zêlin mi khawngaih la; I lainatna nasatzia ang zêlin ka bawhchhiatnate hi thai bo vang che .... Ka bawhchhiatnate hi ka hre ta si a: ka sual hi ka hmaah a awm fo ṭhîn a ni. I chungah, I chung chauhvah thil ka tisual a, I mithmuhah thil sual chu ka lo ti ta a; ... Husopin mi tifai la, tichuan ka fai ang; Mi silfai la, tichuan vur aiin ka var ang.... Aw Pathian, keimahah hian thinlung thianghlim tak siam la, ka kawchhûngah hian thlarau dik tak siam thar leh ang che. I hnen ata hi mi paihbo suh la, I Thlarau Thianghlim hi mi lâksak suh ang che. I mi chhandam hlimna chu pe leh la, Thlarau tihnuamin mi chelh ang che.... Aw Pathian, Nang mi Chhandamtu Pathian, thisen chhuahnate lakah mi chhanhim ang che; tichuan ka lei hian I felna thu hi hlim takin hlaah a sã ang” (Sâm 51:1-14) Hetiang simna hi chu kan theihnain a thlen bâk a ni; chunglama han chho, mihringte hnena thilthlãwnpêkte Petu- Krista hnen aṭang chauhva neih theih a ni. Mi tamtak chu hetah ngei hian an diklo ṭhîn, chuvang tak chuan Krista’n ṭanpuina pêk A duh pawh an dawng thei ṭhîn lo. An sualte an sim hmasak zet loh chuan Krista hnena kal thei lo niin an ring a, chu simna chuan an sual ngaihdamna turin kawng a buatsaih niin an ring bawk. Simna chu sual ngaihdamna ai chuan a hmasa zâwk a ni tih hi a dik e; thinlung chhûng taka simna hian Chhandamtu a mamawhzia chu a hre chhuak si ṭhin. A nih leh misual chuan Krista hnena a lo kal theih hmain a sim hun a nghâk kher dâwn em ni? Simna chu misual leh Chhandamtu kâra kawng daltu tur a siam em ni? Bible chuan misualin Krista sawmna a ngaihven theih hmain a sim ngei ngei tur a ni tiin a zirtîr lo. “Nangni thawk rim leh phurrit phur zawng zawngte u, Ka hnênah lo kal ula, Keima’n Ka chawlhtîr ang che u,” (Matthaia 11:28) A ti zawk a ni. Krista hnena chhuak chu ṭhatna a ni a, chu chuan simna dikah a hruai ṭhîn a ni. Peteran Israel mite hnena, “Amah ngei kha Pathianin Lalah leh Chhandamtua awm atan A dinglamah A chawimawi ta a, Israelte sual simtîr tur leh ngaidam turin,” (Tirhkohte 5:31) tia a sawi khan he thu hi a tichiang ta a ni. Krista Thlarauvin kan chhia leh ṭha hriatna a kaihharh chauh loh chuan sual simna kan nei thei lova, chutiang bawkin Krista lovin sual ngaihdamna a awm thei lo. Krista chu thil dik tinreng tihtumna bul a ni. Sual dona tur thinlunga rawn tuh theitu chu Amah chauh hi a ni. A Thlarau Thianghlimin kan thinlung chhûngah a thawk tih hriatna fiah tak chu thutak leh thil thianghlim kan lo duhna te, kan sualnate kan lo hriatna te hi a ni. Isuan, “Kei lei atã khaikãnin Ka awm chuan, mi zawng zawng Keima hnênah Ka hîp ang,” (Johana 12:32) A lo ti tawh si a. Krista chu khawvêl sualna avanga thî- Chhandamtu angin misual hnênah chuan A in-tilang ngei tur a ni. Kalvari kros chunga Pathian Beram No kan han thlirin tlanna thurûk chu kan thinlung chhûngah a lo lang ṭan a, tichuan Pathian ṭhatna chuan siamnaah min hruai ṭhîn a ni. Misual tana thîin, Krista chuan hriatthiam zawh sen rual loh hmangaihna A lantîr a. Misualin he hmangaihna hi thlîr a, a thinlung tinemin, a rilru a khawih êm êm a, sual simna a nei ta ṭhîn a ni. A châng chuan miten, Krista hnen lamah hruaiin an awm tih an inhriat hmain an sual chîn ṭhenkhatte an lo bansanin, an awmdan sualte chu an lo zahpui ṭhin a ni tih hi a dik hle mai. Mahse miten thil dik tih an duh changa insiamṭhat tumna an neih apiang hian Krista thiltihtheihna chu anmahniah a lo awm a ni. An hriat si loh thuneihna khân an thinlung chhhûngah a thawk a, chhia leh ṭha hriatna chu tihchak a lo ni a, pawnlam nundan chena siamṭhatina lo awm ṭhîn. Krista’n A kros thlîr tur leh, an sualnain Ani chu a ṭihnatzia hrefiah tura A hip lai chuan, an chhia leh ṭha hriatnah chuan thupêk chu a lo lût a. An nundan suahsualzia leh an rilrua sualna thûkzia chu an hnen ngeiah tihlan a lo ni a. Kristâ felna ṭhenkhatte chu an lo hrethiam a, “Sual hi enge a nih a, tlanna tura chutiang inthawina hial a ngaih tâk? Heng hmangaihna zawng zawng te, tuarna zawng zawng te leh inngaihtlawmna zawng zawngte hi, kan boral loh a, chatuana nunna kan neih zâwk nana ngen an ni lawm ni?” an ti ṭhin. Misual chuan he hmangaihna hi a hnar thei a, Krista hnena hipa awm pawh a duh lo thei; mahse a hnial loh phawt chuan Isua hnen lamah hip a ni ang; chhandamna tura remruat hriatthiamna chuan, Pathian Fapa tuartîrtu, ama sualnate chu sim tûrin kros bulah chuan a hruai ngei ang. Pathian Thlarau, thil siam chunga thawktu bawk khan, mihringte thinlungah thu sawiin, thil eng emaw an la neih loh neih châkna ropui tak an rilruah A pe a. An duhzawng chu khawvêl thilte hian a titlai zo lo. Pathian Thlarau erawh chuan muanna leh chawlhna pe thei—Krista khawngaihna leh thianghlimnaa lawmna chauh a zawnpui a. Chhandamtu chuan thil hmuh theih leh hmuh theih lohtein, sual nawmchen kham theihlohna aṭanga malsawmna tawp theilo chu miten Amaha an neih theih zawk nân, an thinlungte hruai turin A thawk reng a ni. Tuihal apiang hnena thuchah chu, “Tuihal apiang lo kal rawh se, a duh apiangin nunna tui hi a thlãwnin la rawh se,” (Thupuan 22:17) tih hi a ni. He khawvêlin a peê theih aia thil eng emaw ṭha zawk in thinlunga in châk hian, chu châkna chu in rilrua Pathian âw angin in lo hria a. Krista chu A hmangaihna tawp lo leh A thianghlimmna famkim chuan in hnena A rawn tihlan theih nân simna pe tur tur che uin, Pathian chu dîl ṭhîn rawh u. Chhandamtu nunah chuan Pathian dan bulpui—Pathian leh mihring hnena hmangaihna chu famkim taka lantîr a ni. Ṭhatna leh mahni hmasial lo hmangaihna chu A nunphung a ni. Chhandamtu kan han thlîr a, A hnen aṭanga ênna kan chunga a lo thlen hian, kan thinlung sualziate chu kan hmuchhuak ṭhîn a ni. Nikodema angin, kan awmdan a fel tâwkin, kan nunchang a dik tawk a lawm tiin mahni kan lo infak mai thei a; misual dangte angin Pathian hmaah chuan inngaihtlawm pawh ngaiin kan ring lo bawk thei e; mahse Krista hnen aṭanga ênnain kan thinlung a rawn chhun ên chuan kan thianghlim lohzia chu kan hmu thei ang; mahni hmasialna te, Pathian dona te, nun tibawlhhlawh thei thil reng rengte chu kan hmu chiang thiam tawh ang. Kan felna chu silhfen bawlhhlawh ang ngei a lo ni tihte kan hria ang a, sual bawlhhlawh tlengfai thei leh kan thinlungte tithar thei chu Krista thisen chauh kha a lo ni tihte kan hria ang. Pathian ropuina êng leh Krista thianghlimna êngin rilru a rawn chhun ên hian bawlhhlawhna tinreng mai a lo langfiah a, mihring nungchang famkimlohnate a rawn tilangsar vek bawk ṭhîn a ni. Duhna thianghlimlo te, thinlung bawlhhlawh te leh ṭawng bawlhhlawh chenin a rawn tilang chiang ṭhîn a. Misualin Pathian dan hnawla thil diklo a tih tâkte chu ama mithmuh ngeiah tihlanin a lo awm a, tichuan a rilru chu Pathian Thlarau enfiahnaah chuan a hrehawm ta êm êm a. Krista nungchang bawlhhlawh lohzia leh thianghlimzia a han thlir phei chaun amah leh amah a lo inten êm êm ṭhîn. Zawlnei Daniela chuan vanram palai a hnena rawn tirh thlâk, ropuina hual vel a han hmuh lai chuan, a chaklohzia leh a famkimlohzia inhriatnain a lo khat ta a. A thil hmuh makzia hrilhfiah nan heti hian a sawi: “Keimahah hian chakna reng a awm lo va, ka mawinate lah chu a chhe zo ta si a, thahrui reng ka nei ta lo,” (Daniela 10:8) tiin. Thlarauvin chutiang a lo tawh zet chuan a duhãmnate kha lo haw êm êmin, mahni inhmangaihnate a lo ten ta a. Kristâ felna zarah chuan Pathian dan leh Krista nungchang nena inremna thinlung chu a zawng ṭhîn. Paula chuan, “Dan thua felna lamah chuan,” pawnlam thiltih chungchangah chuan, “Sawiselbo” (Filipi 3:6) a inti a, mahse thlarau lam dan chungchângah chuan misual a ni tih amah ngei a lo inhmu a. Pawnlam nundana mihringte dan ziak anga relnaah chuan sual lo tûrin a insiam thei a, mahse dan thianghlim thûkzia te a zuk thlir a, Pathianin amah A hmuh ang a, amah leh amah a han inhmuhfiah zet kha chuan, a inngaitlawm ta êm êm a. “Hmanah khan kei dan lovin ka nung a, nimahsela, thupek chu a lo awm ve leh sual a lo harh a, kei chu ka thi ta a,” (Rom 7:9) a ti. Thlarau lam dan a han hmuh chuan sual chu râpthlâk takin a lo lang a, a inngaihsanna te chu a lo bo ta a ni. Pathian chuan sualna zawng zawng hi ang khat vekin a ngai lo va; thiltihsualah hian mihring ngaihdan pawh a inang lo, mahse Pathian mithmuhah hi chuan te lua reng reng a awm lo. Mihring rorelna chu mahnihmasial leh famkim lo a ni a, Pathian erawh chuan thil engkim hi an nihna ang takin A teh vek a. Zurui chu entleu a ni a, a sualna avangin vanram a kai lo ang tia sawi a ni. Chapona te, mahni hmasialna te hi a ni Pathian duh lohzawng riau chu, zilhhau loh a ni fo si. A nungchang hmangaihna nen chuan a inkalh tlat si a, chu hmangaihna chu khawvêl sual hmaa mi tawh kha a ni. Sualna râpthlâk taka tlu chuan a zahthlakzia chu a hrechhuak ṭhin a; mi chapo erawh chuan chutiang mamawh chu a hrechhuak ṭhin a; mi chapi erawh chuan chutiang mamawh chu a hre ve lo va, chutichuan Krista’n malsawmna tawp theilo pek A tum kha a lo hnial ṭhin a ni. Chhiahkhawntu, “Pathian, kei misual hi mi khawngaih rawh,” (Luka 18:13) tia ṭawngṭai khan midangin amah an hmuh angin mahni chu misualah a inngai a; mahse a mamawh ber chu a hria a, a sualna avanga zak êm êm chung chuan, Pathian hnênah zahngaihna dîl turin a lo kal ta a nih kha. A thinlung chu Pathian Thlarauin hna a thawh theih nân leh, sual thiltihtheihna aṭanga a lo zalen theih nan a hawng ta a ni. Farisai, chapo leh fela inngai ṭawngṭaina erawh kha chuan, Thlarau Thianghlim thuneihna a duh lo thung a, Pathian aṭanga a hlat êm avang khan, Pathian thianghlimna ber pawh a hre lova, engmah a dawng bawk hek lo. I sualzia i hmuh phawt chuan insiamṭhat deuh hun nghak suh. Mi tam tak chuan Kristâ hnena kal tur chuan ṭha tawkin an inring ṭhin lo a. A nih leh nang, mahni theihnaa ṭhat theih deuh zawk i inring emaw chu? “Ethiopia mi hãngin a vun a thlâk thei em ni? A nih leh keitein a zia a thup thei em ni? Chuti a nih chuan nangni pawhin thil ṭha in ti thei ang chu! Thil sual tih hi in pi leh pu dan a ni si a.” (Jeremia 13:23) Pathianah chauh hian kan tan ṭanpuina a awm a. Ngenna lian zâwkte kan nghâk tur a ni lo. Mahniin engmah kan tithei si lo va, kan nihna ang chiah hian Krista hnênah kan kal mai tur a ni. Pathian chuan A khawngaihna duh lotute pawh, A hmangaihna leh zahngaihna chuan A la chhandam cheu dawn a ni, tiin tumah mahni inbum chawp suh se. Sualna râpthlâkzia chu kros chungah chauh khan a ngaihruat theih a ni. ‘Misual paih chhuak tur chuan Pathian chu A ṭha lutuk’ an tih chuan Kalvari tlang lam thlîr rawh se. Mihring chhandamna tur kawng dang reng a awm loh avang leh, he inthawina tel lo hi chuan, mihring tan sual thiltihtheihna bawlhhlawh aṭanga chhuah theihna tur kawng dang reng a awm theih dawn loh avangin, Krista khan thuawihlohna sual chu A chungah nghatin, misualte aiah chuan A lo tuar ta a ni. Pathian Fapa thihna leh tuarna leh hmangaihna hian, sual râpthlâkzia aṭanga himna chu a awm lo tih a tilang chiang bawk. A chang chuan sual la sim lote chuan, anmahni inhliahkhauh nân Kristian naran chanchin chu hetiang hian an sawi ṭhin a: “Kei pawh anmahni tluk bawk chuan ka ṭha a ni. An awmdanah kei aia mawina leh mahni inphatna a awm bîk chuang lo. Keimah ang bawkin nawmchenna an ngaina ve tho si,” tiin. Chutiang chuan thil tih tur an tih peih si loh thùp nan midangte diklohna chu an sawi a. Midangte sualna leh tlinlohna chuan tumah a ngaidam chuang lo. LALPA chuan entawn tur mihring dik lo tak min pe zawk a ni. Chung Kristian nundan sawiseltute chuan, nundan mawi zâwk leh entawn tlak zâwk an entîr tur a ni. Kristian awmdan tur an hriat si chaun, an sualna chu a nasa zâwk dâwn lo’m ni? Thil dik chu an hria a, an la ti duh lo cheu si. Nakinah tihna lakah invêng fîmkhur rawh. Krista zara thinlung thianghlim zawnna leh, i sualte ngaihdamna tur chu ngaihthah suh. Sang tam tak chuan hetah hian an tisual a, an chatuan nunna an chãn phah ṭhîn a ni. He nunna tawi leh chianglo takah hian ka chêng reng lo ang a; mahse thil hlauhawm tak a hlauhawmna hriatthiam zawh rual loh chu a awm a, chu chu Pathian Thlarau Thianghlim kohna aw awih thuai loh a, suala awm rengna hi a ni. Chutiang vuaichãna chu thil sual tak pawh a ni nghe nghe. Sual te tak tê ngaih theih pawh hi chatuan boralna min thlentu a ni thei. Kan hneh loh khan min hneh ang a, kan chhiatna thlentu a ni mai ang. Evi leh Adama chuan ‘theirah ei phal loh ei mai mai chu engmah tham a ni lo ang,’ Pathianin ‘thil hlauhawm deuh a lo thleng ang,’ A tih ang êm kha chu lo thleng thei tak tak dawnin an ring lova. Mahse he thil te tak tê hi Pathian dan danglam thei lo leh dan thianghlim bawhchhiatna chu a niin, mihring chu Pathian hnen aṭangin a lo tihrang ta bawk a, sualna chuan thihna tuilian kawngkhar leh manganna sawisen rual loh chu kan khawvêlah hian a rawn hawng ta a ni. Hman lai ata tunlai thleng hian, kan lei aṭang hian lungngaihna rumri chu chatlak lovin a lo chhuak a, mihring thuawih lohna avangin, thil siam pumpuite chu hrehawm tuarin an lo rûm ṭhîn a ni. Van ngei pawhin Pathian dodala mihring helna chu A lo hria a. Kalvari chu Pathian dan bawhchhiatna vanga tlanna maktak hriatrengna angah a lo ding ta. Sual chu thil mai maiah i ngai suh ang u. Dan bawhchhiatna reng rengte leh Krista khawngaihna thlahthlamna emaw, hnarna emaw te reng reng hi, nangma chungah bawk a tla leh ṭhîn a ni; thinlung a tisakin, duhthlanna a tichhia a, hriatthiamna a tingawng a, Pathian Thlarau Thianghlim sawmna pantîr lova, i pan theihna pawh a titlêm bawk a ni. Tam tak chuan sualna kawng chu an duh hun hunah thlâk theiin an inring a. Zahngaihnaa sawmna chu an tinawmnah theiin an ring bawk a. Mahse chung chuan an rilru a khawih leh hlê bawk a ni. Khawngaihna Thlarau an lo hmuhsit hnua, an duhthlanna chu Setana lama an pêk tawh hnu pawhin, an kawng chu tihdanglam thut theih niin an ring ṭhîn. Mahse chuti maia awlâi chu a ni lo, damchhunga thil hriatchhian leh lehkhathiamna hian, nungchang chu a lo khawih a, tichuan mi tlêmtein Isua anga awm an lo duh ṭhin. Rilrua thil sual tihduhna pakhat lek, châm reng leh nungchang diklo langsar tak pakhat lek pawh hian, Chanchin Ṭha thiltihtheina chu a ti mumal lo tulh tulh ṭhîn. Thil sual lawmna reng reng hian rilruin Pathian a huatna kha a lo ṭanpui ṭhîn a ni. Pathian rinlohzia emaw Pathian thutaka danglamna miina neihlohzia emaw tilangtu chuan, ama tuh ngei kha a seng leh dawn a ni. “Misual chu a sualna hrui ngeia phuarbehin a awm ang,” (Thufingte 5:22) tih mifingin a sawi aia sual chhete pawh a hlauhawmzia sawina thu Pathian lehkhabuah a awm chuang lo. Krista chu sualna ata min chhanchhuak tur chuan A inpeihsa reng a, mahse kan duhthlanna ngei pawh kha sual lamah a lo kawi a, zalen taka awm pawh chu kan lo duh ṭhîn lo va, A khawngaihna kan pawm duh si loh chuan kan tan thil dang enge A tih theih tâk ang? A hmangaihna kan lo hnar hian keimahni ngei kan intiboral chawp a ni. “Ngai teh u, tun hi hun lawmawm chu a ni a; ngai teh u, tun hi chhandamna nî chu a ni.” “Vawiin hian A âw in hriat chuan, in thinlung tikhauh suh u.” (2 Korin 6:2; Hebrai 3:7, 8) “Mihring chuan pawnlam landan a thlîr a, LALPA erawh chuan thinlung lam A thîr ṭhin.” (1 Samuela 16:7) Mihring thinlung, lawmna leh lungngaihna rilru, thinlung kawhmawhbawla vakbo hnu, bawlhhlawhna leh bumnaa khat hi a ni A thlîr ṭhin ni. A chetziate leh a thiltumte chu A hria a. Sâm phuahtuin engkim Hmutu lama a pindante a hawnsak angin, i sual bawlhhlawh zawng zawng nen chuan Ama lam pan rawh. Sâm phuahtu chuan, “Aw Pathian, ngun takin mi enchhuak la, ka thinlung hi hria ang che; mi fiah la, ka ngaihtuahnate hi hria ang che. Keimahah hian suahsualna kawng reng reng a awm eng awm lo en la, chatuan kawngah chuan mi hruai ang che,” (Sâm 139:23, 24) a ti. Thinlung hi tlenfai a nih hmâ loh chuan, tam takin Pathian anna nei, rilrua a hriat a hriatna sakhua chauh an lo ring ṭhîn. I ṭawngṭaina chu, “Aw Pathian, keimahah hian thinlung thianghlim tak siam la, ka chhûngah hian Thlarau diktak siam thar leh ang che,” (Sâm 51:10) tih hi ni rawh se. Nangma rilru ngeiin khun takin chhût rawh. I nunna a lo tawp dawn ṭepa i awmdan duhzawng anga awm turin ṭhahnemngai rawh. Hei hi Pathian leh nangma inkara siam fel tur thil, chatuan atana siamfel tur chu a ni. ‘A ni mai thei’ tih mai mai beiseina chuan, i chhiatna a rawn thlen zâwk ang. Pathian thu chu ngun taka ṭawngṭai chungin zir la. Pathian dan leh Krista nunna, thianghlimna bul, “Chu thianghlimna tel lova tuman LALPA an hmuh theih lohna chu,” (Hebrai 12:14) chu thu chuan i hmaah a rawn tilang a; chu thu chuan sualna chu rawn hriattîrin, chhandamna dawng chu mawl takin a rawn puang a ni; chu thu chu i rilrua Pathian awmin a thu a rawn sawi angin ngaihven rawh. Sualna nasatzia i hmuh a, i nihna ang taka nangmah ngei i han inhmuhin, beidawng mai suh la. Krista chu misualte chhandam turin a ni A lo kal ni. Keimahniin Pathian rem tute kan ni lo va, mahse hmangaihna mak tak, Kristaah chuan Pathianin “Khawvêl hi Amah nen inremin A siam a.” (2 Korin 5:19) Pathian chuan A fate thinlung sual tak chu A hmangaihna chuan a thlen reng a. Pathianin chhandam tura A zawnte chunga A dawhtheih ang leh A zaidam angin leia nu leh pate hian an fate danbawhchhetu chuti taka nema thlem thei an awm hek lo. Ani’n vakbote hnena sawmna thu duhawm A sawi ang aia duhawm leh mawia sawi thei mihring reng reng an awm si lo. A thutiam zawng zawngte leh A hriatlawktîrna zawng zawngte hi hmangaihna sawi thiam rual loh chu an ni zâwk si. Setana’n, “Misual i ni” tia a rawn hrilh che chuan, i Tlantu énin, A ṭhatna thû sawi rawh. Nangmah ṭanpuitu tur chu Ama ênna lam thlîr hi a ni. I sual chu zêp suh la, “Krista Isua misualte chhandam turin khawvêlah hian A lo kal,” (1 Timothea 1:15) tih leh, A hmangaihna mak tak chuan A chhandam thei che a ni tih hi hmêlma chu hrilh la. Isuan leibatu pahnihte chung chang thu Simona a zawk khan, “Pakhat chuan tlemte a ba a, a dang chaun tam tak, mahse an pahnih chuan a ngaidam ve ve ta a, a tu zâwk chuan nge a LALPA hmangaih nasa zâwk ang?” tiin A zawt a, Simona chuan, “A ngaihhnathiam zual zâwka chuan,” (Luka 7:43) tiin a chhang a. Misual tak vek kan ni a, mahse ngaihdama kan awm theih nan Krista A thi ta a. Pa hmaa kan âia A pêk tur chuan A thawina hlu tak chu a tawk hle a ni. Chung a ngaihhnathiam zual berte chuan Ani chu an hmangaih zual ang a, A hmangaihna ropui leh thâwina chawimawi tûrin A lalṭhutthlêng hnaih berah an ding ang. Pathian hmangaihna hi kan hriat nasat zawh poh leh, sual râpthlâkzia hi kan hrechiang mai a lo ni. Mi phuar tláttu, sual khaidiat seizia kan han hmuh a, Krista’n kan aia inthawina A siam tawp chin nei lo kan hriatthiam hian, kan thinlung chu sualhriatna leh zaidamnain a lo tui ṭhîn a ni.
0 Comments
Leave a Reply. |
Categories
All
ArchivesKan Article-te hi kan editor approve-te an ni vek lo. |